الیکشن کمیشن خفیہ رائے دہی سے انتخابات کرانے کا پابند ہے ،لیاقت بلوچ


لاہور : نائب امیرجماعت اسلامی، سابق پارلیمانی لیڈر لیاقت بلوچ نے کہا کہ الیکشن کمیشن آئین کے مطابق وزیر اعظم اور وزراء اعلیٰ کے علاوہ خفیہ رائے دہی سے انتخابات کرانے کے پابند ہیں یہ ہی جمہوری اور ضمیر کے مطابق ووٹ دینے کا مسلمہ طریقہ ہے ۔

لیاقت بلوچ نے وہاڑی ، بہاول پور ، ملتان ، حیدر آباد ، کراچی میں سیاسی انتخابی کمیٹیوں جلوس اور ختم بخاری سالانہ تقاریب میں شرکت کے بعد لاہور میں جے آئی یوتھ اور بلدیاتی امیدواروں کے ساتھ نشست میں کہا کہ سیاسی جماعتیں جمہوری ، اخلاقی اور قانونی ضابطے مانتی نہیں اور نہ ہی اس کے مطابق تیاری کرتی ہیں ۔ قانون کے زبردستی ڈنڈے سے اصلاح کی بجائے نئی نوعیت کی خرابیاں جنم لیتی رہیں گی ۔

الیکشن کمیشن کے پاس سینیٹ کے انتخابات خفیہ رائے دہی کے علاوہ کوئی آپشن نہیں، آئین سے ہٹا ہوا کوئی طریقہ کار انتخابات کے تنازع اور غیر آئینی حقیقت کو برقرار رکھے گا ۔ انہوںنے کہا کہ  جماعت اسلامی سینیٹ کے انتخاب میں خیبر پختونخوا میں سیٹ اور ووٹ ایڈجسٹمنٹ کی حکمت عملی اختیار کرے گی اور قومی اسمبلی ، سندھ اسمبلی میں ہمارے ممبران غیر جانبدار رہیں گے ۔ جماعت اسلامی نے 2018 ء انتخابات کے بعد واضح دو ٹوک حکمت عملی اختیار کر لی ہے کہ سیاسی اور انتخابی محاذ پر اپنے پرچم ، منشور ، ترازو نشان اور کارکنان کی مسلسل جدوجہد سے ملک و ملت کو بحرانوں سے نجات دلائیں گے ۔

جماعت اسلامی مرکزی مجلس شوریٰ کی طے شدہ حکمت عملی کی پابند ہے کوئی دباؤ اور منفی بے بنیاد پروپیگنڈا ہمیں اصولی اور سیاسی حکمت عملی سے دستبردار نہیں کرا سکتا ، ماضی کے حکمرانوں اور پی ٹی آئی حکومت نے برابری کی بنیاد پر عوام کو مایوس کیا ہے ۔

مزید پڑھیں: حکومتیں بدل جاتی ہیں لیکن عوام کے حالات نہیں بدلتے:لیاقت بلوچ

انہوں نے کہا کہ عمران خان سرکار نے 31 ماہ کے دور اقتدار میں نظریاتی ، اخلاقی ، تہذیبی اقدار کا بیڑہ غرق کیا ہے ، سیاسی ، پارلیمانی اور اقتصادی اعتبار سے ملک دیوالیہ کر دیا ہے ، پاکستان کی شہ رگ مسئلہ کشمیر پر پسپائی ، مجرمانہ غفلت ، بزدلانہ حکمت عملی کی وجہ سے یہ تاثر گہرا ہو گیا ہے کہ عمران خان کشمیر کا سودا کر چکے ہیں، مسئلہ کشمیر پر کوئی سازشی حل مسلط نہیں ہونے دیں گے ۔ کشمیریوں کی قربانیاں لازوال ہیں، حق خود ارادیت ہی مسئلہ کشمیر کا پائیدار حل ہے وگرنہ مسلط کردہ ہر حل آزادی کی تڑپ اور عزم کو اور تیز کر دے گا ۔