میرے مالکا میں نچ نچ تھک گیا واں۔ میرا مالک توں ایں پر ایتھے ہر کوئی اپنے آپ نوں میرا مالک سمجھدا اے۔
جیھڑا اٹھدا اے مینوں نچان لگ پیندا اے۔ میں تیرے باجوں کسی ہور نوں نہ کدی اپنا مالک منیا اے تے نا مننا اے پاواں میری جند ہار جائے پر تو کدوں میری مدد نوں آویں گا یا اپنے فرشتے بھیجیں گا۔ میری ماں مینوں موسی علیہ السلام دی تے فرعون دی کہانی سناندی سی کہ کس طرح موسی علیہ السلام فرعون دے گھر وچ پلے۔کدی مینوں دسدی سی کس طرح ابراهيم عليه السلام نوں اس وقت نمرود نے اگ وچ سٹھیا سی تے تو مالکا اپنے فضل نال اگ نوں ٹھنڈا کردیتا سی۔ گلاں تے ہور وی بڑیاں میری ماں مینوں سنادی سی، کسطرح یوسف علیہ السلام دے مترے بھراواں انناں نوں کھو وچ سٹیا سی۔ انناں سب دی مدد نوں فرشتے تہاڈے فضل وکرم نال پہنچے۔ منیا اسی نہ پیغمبر آں تے نہ پیغمبراں دی اولاد آں کہ تو ساڈی مدد نوں فرشتے بھیجیں ۔ مالکا تسی سب جاندے او کہ اسی تیرے پیارے حبیب صلی اللہ علیہ وسلم دی امت آں۔ پر اسی بہت گناہگار آں۔ کہ اسی تیرے حبیب صلی الله علیہ وسلم دی تعلیمات تے عمل نئیں کیتا۔ تیری بھیجی ہوئی کتاب نوں سمجھن دی کوشش ہی نہیں کیتی۔ اس انگنت عذاباں وچ مبتلا آں ۔ ساڈے کول معافی واسطے الفاظ وی نہیں ساڈے کول تیرے سامنے سجدہ کرن والے سر وی نہیں اسی ہر او گناہ کیتا جس تو تسی منع کیتا۔ میری عقلوں بار اے کہ معافی کداں منگاں پر تو سب جانداں ایں ۔ تو غفور ایں رحیم ایں ، تو جاندا ایں گنہگار قوم دی کی سزا اے تے معافی کداں ہوندی اے۔ ساڈے ذھن روشن کردے سانو اپنے راستے تے چلا دے جیڑا ھدایت دا راستہ اے، صراط مستقیم اے۔ تیریاں توں ہی جاندا ایں مالکا۔ کرم کر، فضل کر سارے راہ تو ہی جاندا ایں بھلیاں نوں سارے راستے تو ہی وکھانا ایں۔ ساڈا وی کوئی حل کردے۔ حل تیرے تو علاوہ کسے ہور کول نہیں اے مالکا۔ مالکا مینوں تے ساڈی ساری قوم نوں اپنی غلطیاں دا احساس اے۔ کوئی درگزر دا معاملہ کردے مالکا۔ مینوں مکمل یقین اے توں سانوں معاف کریں گا۔ زندگی تے آخرت آسان کریں گا۔ مالکا توں ہی سب کچھ ایں اسی نادم آں ساڈیاں مشکلاں آسان کردے۔ ساڈی آس امید سب کجھ تیرے نال اے مالکا۔ ہور تھاں وی کوئی نہیں ۔ تیرے اگےساڈے ٹٹے، لنگڑے، لولے، سجدے نیں انناں نوں قبول کر تے سب آسان کردے۔ جو تو ہی کرسکدا ایں۔ ہور تے ہے وی کوئی نہیں۔ مالکا میرا مان رکھ تیرے بندے آں تیرے کولوں ای منگدے آں آسانی دنیا تے آخرت دی۔ دے دے تیری مہربانی مالکا۔
